Category: INSTANT RESPONSE

ഇതിനുമുമ്പ് എല്ലാവരുംകൂടി വാഗ്ദാനംചെയ്ത വീടുകൾ മുഴുവ൯ പണിതിരുന്നെങ്കിൽ ഇന്ത്യയിലെന്നല്ല ലോകത്തൊരിടത്തും ഭവനരഹിത൪ ഉണ്ടാകുമായിരുന്നില്ല…

എരുമേലി സ്കൂളിൽ ന്യായമായ യാതൊരു കാരണവുമില്ലാതെ കുറേപ്പേർചേർന്നുണ്ടാക്കിയ ബഹളത്തിന്റെ പേരിൽ,  അദ്ധ്യാപകർക്കെതിരെ അന്യായമായ നടപടിയെടുത്ത് പ്രശ്നം അവസാനിപ്പിക്കാൻ ശ്രമിക്കുന്നത് ഏതു വിവേകത്തിന്റെ പേരിലായാലും ഉചിതമല്ല. നിയമപരമായി നേരിടേണ്ട ഒരു പ്രശ്നത്തെ ചില ഭയപ്പാടുകളുടെ പേരിൽ ഒതുക്കിത്തീർക്കുന്നത് അപകടമാണ്. നമ്മുടെ നാട്ടിൽ വളർന്നുകൊണ്ടിരിക്കുന്ന വിനാശകരമായ ഒരു മനോഭാവത്തിന്റെ ലക്ഷണങ്ങളാണിത്. അതിനെ ആ രീതിയിൽ മനസിലാക്കി ഉത്തരവാദിത്വപ്പെട്ടവർ ഉചിതമായ നടപടികൾ സ്വീകരിച്ചില്ലങ്കിൽ എല്ലാവർക്കും സ്വാതന്ത്രത്തോടെ ജീവിക്കാനുള്ള സാഹചര്യം നമ്മുടെ നാടിന് നഷ്ടമാകും. മതമൈത്രിക്കു പേരുകേട്ട എരുമേലിയിൽ ഇതുപോലൊരു പ്രതിസന്ധിയുണ്ടാക്കിയത് ഏതായാലും ദൌർഭാഗ്യകരമായിപ്പോയി.

സ്വന്തം സ്ഥാനാർത്ഥിയെ മത്സരിപ്പിക്കാൻ സംരക്ഷണ സമിതികൾ തീരുമാനമെടുക്കുമ്പോൾ ഒരു കാര്യം മറക്കരുതെന്ന് തോന്നുന്നു. രാഷ്ട്രീയ തിമിരം ബാധിച്ച ചിലർ പോളിംഗ് ബൂത്തിലെത്തുമ്പോൾ തന്റെ പാർട്ടിയുടെ ചിഹ്നം മാത്രമേ ചിലപ്പോൾ കാണുകയുള്ളു. വോട്ടുചെയ്താൽ കാശു കി
ട്ടുമെന്നോ മറ്റെന്തെങ്കിലും നേട്ടമുണ്ടാകുമെന്നോ ഉറപ്പുകിട്ടിയാൽ സംരക്ഷണ സമിതികളുടെ പുറകിൽ ഇപ്പോഴുള്ള എല്ലാവരും ഉറച്ചുനില്ക്കുമെന്ന് ഉറപ്പിക്കാനാകുമോ? കുറച്ച് അച്ചന്മാരും പിന്നെ ചില സ്ഥാപിത താല്പര്യക്കാരുംചേർന്ന് ഉണ്ടാക്കിയെടുത്തതാണ് ഈ പ്രശ്നമെന്ന് ആത്മാർത്ഥമായി വിശ്വസിക്കുന്നവർ ഇപ്പോഴും നാട്ടിലുണ്ടെന്നുള്ളത് നാം മറക്കരുത്. സ്വന്തം സ്ഥാനാർത്ഥിയെ നിറുത്തുന്നതിനേക്കാൾ നിഷേധവോട്ടിനേയോ വോട്ട് ബഹിഷ്ക്കരണത്തെയോ കുറിച്ച് ആലോചിക്കുന്നതല്ലേ കൂടുതൽ നല്ലത്. നിശ്ചയിക്കപ്പെടുന്ന സ്ഥാനാർത്ഥികൾ ഏവർക്കും സുസമ്മതരായിരിക്കുമെന്നും അവരെച്ചൊല്ലി കലഹമുണ്ടാകില്ലെന്നും ഉറപ്പിക്കാനാകുമോ? എവിടെയും ഞുഴഞ്ഞുകയറി കുത്തിത്തിരിപ്പുണ്ടാക്കാൻ ഡിഗ്രിയെടുത്തിട്ടുള്ളവരാണ് രാഷ്ട്രീയക്കാരെന്നതും അവരേപ്പോലെ തരംതാണ കളികൾക്ക് നമുക്ക് ശേഷിയില്ലെന്നുള്ളതും തെരഞ്ഞെടുപ്പു രാഷ്ട്രീയത്തിൽ നമ്മുടെ ബലഹീനതകളാണ്. ഇതു കുറിക്കുന്നത് കർഷകരെയും കർഷകനേതാക്കളെയും നിരുത്സാഹപ്പെടുത്താനല്ല, മറിച്ച് കുടുതൽ ജാഗ്രതയോടെ തീരുമാനങ്ങൾ കൈക്കൊള്ളാനാണ്.

ഏതായാലും ജയിലിലായി. ഇനിയിപ്പോ പ്രസ്ഥാനത്തിനു വേണ്ടി  അമ്പത്തൊന്നു വെട്ടിന്റെയും ചീറ്റിത്തെറിച്ച ചോരയുടെയും ഉത്തരവാദിത്വം ഏറ്റെടുക്കുന്നതുകൊണ്ട് ലാഭം മാത്രമേയുള്ളു. (ഏറ്റെടുത്തതാണോ ഏല്പിച്ചതാണോ എന്നൊക്കെ കാലം തെളിയിക്കും)  ലാഭ വിഹിതമെന്താണെന്ന് ആരെങ്കിലുമൊക്കെ പപ്പരാസികൾ കണ്ടുപിടിക്കുമായിരിക്കും.

എതിരാളികളെ വെള്ള പുതപ്പിക്കാനും  കോടതിവിധിയെ പരിഹസിച്ചുകൊണ്ട് വിചിത്രമായ കണ്ടെത്തലുകൾ നടത്തി പ്രതികളെ വെള്ളപൂശാനും കഴിവുള്ളവർ കേരളത്തിന്റെ രക്ഷാദൌത്യവുമായി തെക്കു വടക്കു നടക്കുകയും മാധ്യമങ്ങളിലൂടെ സത്യത്തിന്റെ നിറം ചുവപ്പാണെന്ന് നിരന്തരം വായാടുകയും ചെയ്യുന്നതു കണ്ടു പൊറുതിമുട്ടുന്നവരുടെ മുമ്പിലേക്കാണ് കസ്തൂരിയുടെ കൈപിടിച്ച് ഇപ്പോൾ രക്ഷകരുടെ വേഷത്തിൽ തങ്ങൾ എത്തിയിരിക്കുന്നതെന്ന് മാന്യ സഖാക്കൾ മറക്കരുത്.  പിന്നെ ഭരിക്കുന്നവരുടെ കൈക്കൊണം കൊണ്ട് ആർക്കെങ്കിലുമൊക്കെ ഇടത്തേയ്ക്കൊരു വേപ്പലുണ്ടായാൽ ഏതെങ്കിലുമൊരു ആപ്പിൽ പിടിച്ചു നിന്നില്ലെങ്കിൽ ശരിക്കും ആപ്പിലാകുമെന്ന് മറക്കരുത്.